更新时间:2012-10-12

爱·回家:【106、107集短評】斜陽里氣魄更壯！

五位超齡童子軍排除萬難走到發現灘再次露營，只爲兌現35年前關於友誼的承諾。當多年前青春嘅身影同現時交疊，當果首錦繡前程又再唱起，發現自己已喺熱淚盈眶！如劇中馬強所言，眼前唔喺五位孱弱老人家，而喺五個都曾經為生命為家人奮戰過嘅戰士，追趕幾十年為屋企人換來健康嘅生活，到宜家呢刻終於可以停底享受人生最寶貴嘅財富——友情！

唔知男仔嘅成長、友情甚至尊嚴喺咪都建立于玩鬧中果份唔肯認輸嘅精神咧？年青時候大家齊齊參加比賽、摞獎、去camp紮營、生火、捉魚、唱歌、打鬧、除褲（喂~）、睇日出又一個個擺出一副大男人姿態扮曬冇王管。到年老之後，先有咁好感情得閑飲茶聚餐，再盡D咪唔肯認老再為實現承諾盤山涉水。幾位老戲骨D戲好到咧，一揮手一握拳一抬頭一句說話一點熱淚，簡直每一滴都喺精髓。老人家呢種精神喺叫人不得不服噶！但講翻轉頭，無論喺想當年或者在當下，最緊要都喺果班陪自己一齊任性嘅老死都仲響度……

諗起幾個月前與朋友響廣州食飯偶遇嘅幾位搭臺阿姨，佢地不知幾咁熱情又幸福，捉住我地喺咁傾計又盛。話自己岩飲過早茶出來噶，醒起昨晚電視節目介紹講呢度有特色嘢食，咪又再過來食咯，話見到你地咁後生真喺好。我話見到你地咁休閒先真正好啊！都喺噶，我地退休咯，個個月都有一筆唔錯嘅退休金慢慢用，仔女大個又生性唔使理，得閑咪約翻班老友出來到處搵下邊度有嘢好食有嘢好玩咯，等陣間仲會去乜乜公園添噶！後來，同另一位朋友提起呢件事，畀佢笑話後生細女咁快就開始憧憬退休生活咁冇激情？我解釋話其實齋喺玩樂有乜咁值得羡慕咧，重點在於到老還有一班老友在身邊陪伴咧！唔，若多年後身邊還有你，還有各位老友，還健在還肯再陪我任性就好啦。到我一百歲生日擺兩圍，大家千祈唔準咁早去賣鹹鴨蛋，一定幫手搞大佢咯^^

但話時話加加埋埋到果時幾百歲，咪話唔擔心噶。所以我諗阿姨口中仔女夠生性都好緊要，如同劇中幾位老人家嘅硬頸就有成家人做後盾！探路、清理路障、設置路牌、安放大班椅、貼身追蹤，見到馬家同涼粉全家總動員果份貼心，好sweet！不愧喺二員作品，唔做作嘅小細節反應出嘅情感先最最真摯溫馨！！

邊個話老人家冇活力噶，珍惜當下珍重友情珍愛家人，自然斜陽裡氣魄更壯，斜陽落下心中不必驚慌,，知道聽朝天邊一光新的希望。互助互勵又互勉，那怕去到遠遠那方……